Ég heiti Ólöf I. Davíðsdóttir og mun leiðbeina á námskeiðinu um bútasaumsgerð sem ég hef gefið heitið "Bútakúnst"

Bútakúnst, sem útleggst "art quilting" upp á ensku, er sú útfærsla sem náði að vekja með mér hina óslökkvandi ástríðu bútasaumsins.

Ég er sjálfmenntuð í bútasaumi og hef hingað til verið einfari á þeim vettvangi. En nú er kominn tími til að koma úr felum og leggja efnin á borðið.

Uppfræðslu hef ég fengið af bókum og vefsíðum og hika ekki við að ráðast á garðinn þar sem hann er hæstur í tilraunum mínum. Enda byggi ég á 30 ára reynslu af almennum saumaskap.

Núna vinn ég m.a. að veggteppum sem sýnd verða á International Quilt Festival í Houston, USA, í haust.